*حدا شفلي البورت كليه تبعي؟...برمت الدنيا ماتركت بلاطة ما دورت تحتها، المشكلة مليان مفاتيح مهمة؛ يعني مثلاً: مفتاح البيت ومفتاح الخزانة ومفتاح البراد، كان معي كمان مفتاح إنجليزي وفرنسي وكوري ....شو فيه كمان؟ ...آه كان فيه كم لقمة هيك بتعرف مفتاح المعدة وكم كيلو سيليكون مفتاح الشهرة....كان فيه كمان صبر، أهم شي الصبر...يعني قديش صرلي مستنية الفرج، بس إجاني...ضيعت البورت كليه!!

* كنت مفتكر حالي عندي قوة وطاقة لا بأس بها..ومعظم الناس بيفكروا مرتين وقت يشوفوني...إنو العلقة معي..مو علقة بنوب...بس لوتلي دراعي.... الظروف ...
بيقولولي لازم أكون أقوى من الظروف...بس ما قدرت..الظروف هي اللي أقوى مني...مع إنها مصنوعة من ورق غير مقوّى...بس الأحكام اللي بتنشأ عنها...مع الظروف...صاروا 2 على البطل..
يعني مو قصة ورق...

*ما بعرف شو عم بيصير معي، يعني كأن في حدا متقصدني ...مبارح ضاع البورت كليه، اليوم ضيعنا الجزدان...كلشي إلا الجزدان...كل أوراقي الثبوتيه فيه ...يعني أنا هلق بلا ثبوتية ، المشكلة مو هون؛ المشكلة كيف بدي إمشي بلا ثبوتية...بطير بعدين، بيصير بدي مين يثبتني!!

* مع إني عملت دوزان للسيارة...وغيرت النوابض...وعيّرت الدواليب...ونفختون...وانتفخ قلبي من المصاريف ...بس الثبوتية...ضايعة...والاختلال صار ملاحظ على حركتي وتحركاتي...والطامة الأنكى هو إنو مرقت السيارة من فحص ميكانيكي شامل بالكمبيوتر والعين المجردة...من قبل الدوائر المختصة والمعنية...ومع ذلك...أفتقد للثبوتية...
يا خوفي يكون إلها علاقة بالمواقف...

*سامعين شي بمرض الشقيقة...نص البلد صايرلها شقيقة ...النص التاني وحيد لأهلو ...بس يشكل عام الكل متضايق من الشقيقة لأن اكتشفنا أخيراً إنو وجع الراس ما بيجيك غير من الدول الشقيقة...وأدام الله عليكم أشقائكم وشقيقاتكم.

* هي بالعموم الشقيقة ووجع الراس...كلو واحد...ضلينا نقول سوا ربينا...لك سوا ربينا...بس الهيئة ربينا لحالنا...مدري وين عبتسرح الشقيقة...أنا خمّنت إنها فورة غضب...بتصيب أي حدا في سن المراهقة وقت يتخن صوتو ويفتكر إنو صار...كبير...
بس ما كنت بتصور إنو في كبير بدو يطبطب ويدلّع...الله العليم على مين يدلع؟؟
على اللي كايدهم...ولا مكايدهم...!!