على الهاتف...
- هو : أنا كم مرة قلتلك ما بتوقفي مع هادا أسامة ... يعني لو ما أنا اجيت بالصدفة كنت ما شفتك ...
- هي : حبيبي والله كنت عم آخد منو المحاضرات تبع أول مبارح ...بعدين كل يلي وقفتون معو عشر دقايق ...
- هو مقاطعاً : أنا ما بفهم عشر دقايق وللا دقيقتين ونص ... ما بتوقفي معو يعني ما بتوقفي ... لا تضطريني المرة الجاية أعملو مشكلة كبيرة ها ... انت لسه ما بتعرفيني لما بيطلع جناني...لكن أنا واحد متل أسامة يعلّم عليّ ويقول ادام رفقاتي انك عم توقفي معو ...اي والله لمسّح الأراضي فيه ...
- هي: لأ حبيبي الله يوفقك ما بدنا مشاكل ... خلص ما عد وقف معو بس انت لا تحاكيه شي ...الله يوفقك حبيبي ايه !!!
- هو: طيب ايه خلص ... بعدين حبيبتي شو هالبلوزة يلي كنت لابستيها اليوم؟ شو منشان يعني أنا وماشي معك كلو عم يطلع ويبحلق وقروني طلعت من السقف ...ضروري تخليني أعمل مشاكل مع العالم يعني؟ بتتوقعي انو اذا حدا لطش شي كلمة رح قلو ايه تفضل سمعني كمان رأيك برفيقتي؟ انت يلي بتتضطريني أعمل خناقات مع العالم ها ...
- هي : لك لاأا خلص ... ما عد البسها ...
- هو وقد تغيرت نبرته : لك لأا مو ما تلبسيها كتير حلوة عليكي ... بس لا تلبسيها عالجامعة ...
- هي: تضحك في خجل ...
(يفتح الباب ويدخل أبوه مزمجرا)
- الأب: لك ساعة عالتليفون يا حيوان ... ما بقا نخلص من تخبيصاتك ورفقاتك البنات أي والله بع بع بع ...
(يضع "هو" يده على طرف السماعة ثم بعد بضع ثوان يعاود التكلم معها)
- هو بصوت خافت: طيب ماشي أحمد بشوفك بكرة ...يالله أهلي لازمون التليفون هلأ ...باي ...
- هي : ألو !!! ألو !!! ... باي ...

علا سليمان