- هو: بتعرفي .. أنا ما في شي ما جربتو و ما في شي ما شفتو، يعني عرفت بنات كتير بحياتي.. منون حبوني كتير بس أنا ما كنت مستعد وقتها لأني أرتبط أو بالأحرى أكتفي بوحدة و منون كان بدون بس يطلعوا معي و نتسلى سوا..
بفترة شبابي (كان عم يقول هي الجملة و عيناه سارحتان في الفضاء و دخان سيجارته يرافق كلماته العميقة جداً جداً) كنت أعمل كل شي ممكن يسليني ..كان عندي الرغبة أني جرب كل الممنوعات و المحظورات، يعني كان أبي يقللي اسهار مع رفقاتك يا ابني هاد حقك و انبسطوا بس لا تعمل شي غلط تندم عليه.. بس أنا كنت شاب منطلق.. متمرد.. ثوروي.. فكنت روح أسهر مع الشلة نشرب و نرقص و نطالع بنات معنا بالسيارة و يعني فهمتي عليي ما بدي كتير أشرح .. بس شو.. كنت أنا الملك تبع الشلة(تتبع هذه الجملة ضحكة صغيرة)
و هي أنا قدامك هلق كتاب مفتوح لأني حابب كون صريح معك و تعرفي كل شي عني لأنو أنا بشوف أنو الصراحة هيي أساس العلاقة الزوجية الناجحة و ما لازم يكون في بينا أسرار ممكن تأذي مستقبل هي العلاقة..
بس طبعاً كل شي قلتلك ياه صار ماضي، يعني أنا هلق عقلت و نضجت و بدي أبدا مرحلة جديدة مع إنسانة متلك هيك جميلة و رقيقة و متفهمة و مثقفة..(و هون بتخلص جملتو بابتسامة و نظرة من ينتظر ردة فعل من الطرف الثاني و تقدير منه على صراحته).

- هي: يعني..أنا ما بعرف شو بدي قلك بس أنا حابة كون صريحة معك كمان.. أنا قضيت أيام حلوة كمان بشبابي، يعني عشت هي المرحلة و استمتعت فيها على قد ما بقدر.. و بتعرف أنا تعرفت على شباب كتير بهديك الفترة و كانوا متلك هيك متمردين و منطلقين.. و كنا...
- هو: (و هون بيقاطعا بالكلام ) يعني أنت كان إلك تجارب سابقة؟ بقصد يعني كنت تعرفي شباب قبلي كتير؟
- هي: أيه .. أكيد كان إلي شلة متلك هيك..و ياما سهرانين و راقصين سوا و ياما طالعين مشاوير مع بعض بالسيارات.. يعني بتعرف سبق و كنت أنت بهي المرحلة..
بس طبعاً بعد ما تخرجت من الجامعة حسيت أنو لا زم أبدأ شي جديد و أنسى هي الفترة اللي بصراحة ما كتير بفتخر فيها، و اللي غلطتت فيها أكيد بس أنا هلق بدي أنسى كل هالشي و أبدأ كمان معك حياة جديدة..
انتهى اللقاء.. في وقت متأخر من الليل اتصل بطلنا بفتاته: أنا فكرت بكلامك منيح.. و فكرت أنا شو بدي بزوجة المستقبل، و وصلت لقناعة أنك مانك المرأة اللي ممكن أأتمنا على بيتي و تصون شرفي و تكون أم ولادي.. آسف كنت بتمنى تكوني مختلفة عن غيرك..على كل حال بتمنالك الخير .. بس ما في نصيب.

كيتيا