رجل ولا كل الرجال هو موظف في مركز عال و(مرتاح ع الآخر) يتعب كل النهار و يحب أن يعيش حياته بهدوء
أراد أن يتزوج
أمه : شو مواصفات العروس اللي بدك ياها يا ابني؟؟
هو: ما بدي ياها متل بنات هالجيل
أمه: برافو عليك يا ابني بنات هالجيل ما بيهمهم غير النطوطة والسهر و الضحك عالفاضي و المليان
هو: بدي ياها مثقفة يعني بتفهم إذا حاكيتها شي شغله مو يعني جامعية ..فهمك كفاية ...يعني تفهم عليي..
أمه: طبعاً لازم الوحدة تفهم على زوجها من أول نظرة
هو : بعتمد عليكي يا أمي ها ما تطولي

بعد فترة شافت الأم بنت من بنات العيل المستورة مثقفة وجميلة و مترباية (والقط بياكل عشاها)
فرح أخونا كتير فيها وما صدق تصير عندو بالبيت
الزوجة: صباح الخير ابن عمي
الزوج: لك يا صباح الفل والورد والياسمين..(بيتذكر هيبتو) روحي اعمليلنا فنجان قهوة (بصوت أعلى) وين الفطور؟؟
هي: ابن عمي شو صايرلك من الصبح أخلاقك بمناخيرك
هو: شو هالألفاظ هي ألفاظ وحدة مثقفة قال مناخيرك قال
هي : لا تعصب ابن عمي أحلى فطور إلك
هو:شوفي يا بنت الحلال أنا بحب المرا تكون مرا
يعني ما بحب تتدخل بشي ما إلها علاقة فيه
هي: وأنا بحب الرجال المسؤول ما رح اتدخل بشي ما بيعنيني
هو :يا عيني عليكي هيدي حركة تحرر النسوان ما اجانا من وراها غير وجع الراس..لازم البنت تحافظ على أنوثتها ودلالها..وتتركك الرجال يشوفوا شغلهم
هي: معك حق ابن عمي لازم المرا تشوف شغلها وتترك الرجال يشوف شغلو
بعد فترة من الزواج..بيرجع الزوج على البيت جوعان وجاي عبالوا طبخ
هي: يعطيك العافية ابن عمي منيح راجع بكير
هو (مكفهر الوجه) الله يعافيكي...ميت من الجوع حطي الغدا
هي  (بخجل أنثوي كما يحب ) خجلانة منك ابن عمي خلصت جرة الغاز قبل ما تخلص الطبخة وأنا ما بعرف غير الجرة..
هو(بغضب) نعم..نعم..شو عم تقولي يا مدام ليش بتنقص من قيمتك إذا غيرتي الجرة؟؟
هي : (بارتباك): لك مو هيك القصة بس مو أنت قلت انك ما بتحب المرا تشتغل شغل الرجال
هو: أنا قلت هيك يعني ما تطلع وتفوت على كيفها..وهي بتعجبني وأنا رأيي هيك..وهالعلاك الفضي..بس شو فيها إذا بتكون كمان قد حالها وبتصّرف أمور بيتها بايدها
ولا كمان إذا الولد عمل بتيابو بدك تنتظري حتى ارجع أنا غيرلو
هي: حاشاك ابن عمي مو هيك قصدي بس والله أنا ما بعرف غي.......
هو: لك لسه عم تجاوبيني والله عال...قال مثقفة قال
انضربي جيبي الجرة عن البلكون ولا كمان بعد تعب النهار بدك أنا احملها...

لينا ضاهر