في المقهى ...

هو1: انشالله أمورك ماشية تمام مع العروس وحددتوا العرس ؟
هو 2: لا والله يا شريك ... ما مشي الحال؟
هو1: له له !!! والله زعلتني ...ليش يا زلمة؟
هو 2: أخي أمها غليظة ... هلكتني طلبات ... لسه دهب وعرس وما بتسكن مع حماية ...العمى العالم شايفين بناتهم ومو مصدقين ...خليها تبقى تخللها ...دايمة ... (نفس أرجيلة عنيف وغاضب)
هو 1: أي سيدي لا تزعل ولا على بالك ..البنات على قفا مين يشيل وألف وحدة بتتمناك بس انت قول بدي اخطب وشوف كيف بيصيروا العالم بيدللوا على بناتهن ...
هو 2: بس كمان أنا ما عدت كتير صغير ... صرت بحيطان الأربعين يا زلمة ...يعني اذا ما كانت الوحدة آطعة ال 23 وبلشت تعنس بيصيروا بيتفزلكوا وعلى كبير وصغير ...
هو 1: لك أنو كبير ؟ أوعى ترد على هالحكي ...شو ما بتعرف انو النسوان بيكبروا وبيختيروا قبل الرجال ...شو بدك تاخد وحدة تضبها مع الكراكيب بعد عشر سنين وانت تكون بعز شبابك !!!
هو 2: يا زلمة مو بس قصة كبير ... كمان الشغل ما عم يزبط ... الشغل المنيح بدو شهادة ومعلومك أنا ما معي كفاءة وباقي الشغل بدون يحرتوا عليك حراتة وبتشحد بنص الشهر ...
هو 1: لك ياااااا أخي ...يا أخي هي الرزقة من عند الله ... بعدين يللي بدها تاخدك منشان مصاريك بلاها ... في ألف وحدة غيرها ...
هو 2: أي وأنا عم قول هيك كمان ... بتاخدني على جمالي ههههههههههه (يهرش ذقنه ويدعك أنفه الكمثري)
هو 1: ههههههههه ... أخي الرّجال ما بيعيبوا شي ... بعدين شو فكرك يعني والله اذا منتكحل ومنتبودر منطلع أحلى منن ...
هو 2: ههههههههههه ... شريك !... شو رأيك تحكيلي مع أهلك يجوزني أختك ... من زمان بدي قلك بس مستحي ...
هو 1: آآآآآآآآآ (يصمت لثوان) ...شريك البنت لسه صغيرة وعم تكمل دراستها ... مو خرجها هلأ جواز وواع وويع ...
هو 2: ايوه ... صغيرة قلتلي ... ايه شو عليه ...
هو 1: يفكر "العمى صدق حالو هاد ... ايه شو ملاقينها للبنت بالزبالة!!!"

علا سليمان