هو: حبيبتي ... جليت الجليات ونظفت الخضرة وحطيتها بالبراد ...
هي: لك الله يخليلي ياك يا رب ولا يحرمني منك ...
هو: ايه وكمان حطيت وجبة غسيل ومسحت غبرة الصالون ...
هي (تهم بارضاع الطفل): ههههه والله منيح كنت ناوية أجل الغسيل لبكرة لأني تعبانة كتير ... لك حبيب ألبي انت ...
هو: بدك شي مني قبل ما انزل ...اذا لازمك شي قولي قبل ما غير تيابي ...
هي: لا حبيبي الله يعطيك العافية يا رب بس دير بالك برة كتير برد ...
هو: أي والله برد ... حبيبتي وينها كنزتي الصوف الكحلية ...
هي : منشورة برة ... بتكون هلأ نشفت ...طلاع جيبها ولا تلم باقي الغسيل منشان ما تتأخر أنا ببقى بلموا ...
هو (بغضب) لا معلش حبيبتي طلعي انت جيبيها ...
هي: يي !!! مالك شايفني عم رضع الصبي!!! بعدين انت لابس وخالص طلاع جيبها شو بيصرلك؟
هو: (يردح) يـــــــــــــا حبيبي ... بدك الجيران يشوفوني وأنا عم لم الغسيل !!! شو بدون يقولوا عني مسطيجة وبريالة ومرتي ممشيتني على كيفها !!! بكره بيقلولي صباح الخير جارتنا !!!
هي: بئ !!! طيب طيب رح جبلك ياها ...
هو: ايه ... هاتي الولد لدشيه وغيرلوا لبين ما تجيبيها ...

علا سليمان