هي: حبيبي يوم الخميس عرس بنت عمّك هدى.
هو: إيه إن شا الله ألف مبروك...
هي: و أنا معزومة و بدي أروح.
هو: إيه طبعاً ما بدها سؤال هي بنت عمّي.
هو: لأ أنا ما عم أسألك، لأنو رايحة رايحة... بس يعني كأنو لازمني فستان جديد للعرس.
هو: هممممممم... طيب استعيري واحد من أخواتك..
هي: لأ شو أستعير من أخواتي!!!!! إيه أهلك شافوا كل الفساتين الي عندون.
هو: همممم... طيب من حدا من رفقاتك.
هي: لك شو رفقاتي ما رفقاتي!!! بهون عليك يعني ألبس فستان قديم و خاصة قدام أهلك.
هو: طيب شو المطلوب هلأ....
هي: يعني إذا بتعطيني شوية مصاري لحتى أشتريلي شقفة فستان بتكون أنت عيني... و بوعدك أنو اشتريه رخيص..
هو: لك شو شوية مصاري و لك... لك ما معي و لا قرش... شو بدك ياني أسرق يعني... و الا أشتغل بالمخدرات من شان تشتري فستان!!!!
هي: لأ يوه شو تسرق... طبعاً ما بدي تشتغل بالمخدرات بس يعني بلكي بتكون مخبيلك كم ألف..
هو: اسمعوا هالسمعة اسمعوا قال كم ألف قال!!!! لك أنا منتوف و عيفان حالي... مفلّس... مالي عرفان كيف بدي كمّل لآخر الشهر!!!
هي:...  
(بعد يومين)
هي: لك شو هاد... لمين هالموبايل؟!!!!
هو: الي... يعني لمين بدو يكون..
هي: و موبايلك القديم؟!!
هو: صرّفتو....... بس يخرب بيتون شقد غليانين هالموبايلات... اتصوري شقفة هالموبايل دفعت عليه أربعين ألف....... صحي حبيبتي اليوم يمكن أتأخر شوي لأنو عازم رفقاتي تحلاية للموبايل الجديد.... الله وكيلك مالي عرفان كيف بدي كمّل لآخر الشهر!!!
هي: ...!؟

شهلا خانجي