*ما بعرف الناس شو بدون بهالتاجر مصرّين يحطو وحدة على عينو لأ والرايح والجاي بينبهو إنو في شي على عينك يا تاجر... ياجماعة حدا يشلو ياها أحسن ما تنكسر عينو ... لأن المشكلة أصلية ، عين ديجتال  أحدث موديل منقيها من  مرج عيون... أيام ما كان في بالمرج عيون سهرانة على حمايتو ومو حاطة عينها عليه!


 *مبارح للصدفة باليل سمعتها عم تحكي هيك بصوت واطي، عطيت بالي لإتأكد، طلعت فعلاً بتحكي.... بس ماهيئتها بتتكلم عربي مع إنو حاولو كتير يقنعونا بهالنظرية.... هوه في كم كلمة عربي وشوية حكي بلغة ما عرفتها ولا بدي أعرفها بس بالغالب الأنجليزي طاغي على الحديث يعني فيكون تقولو بتلطش عربي تلطيش، عربي أو عربية ما عادت فارقة  ما نحنا صرنا ملطشة بس أهم شي اتأكدت إنو الأرض بتلطش عربي الأرض الأرض.


*جارنا أبو سعيد مافي بتمو غير سيرة العلم وكيف لازم الواحد يحث أولادو على العلم.... النهفة إنو أبو سعيد عندو ولدين واحد بيشتغل حفار شواهد والتاني حارس ليلي ولما بتسألو ليش أولادك ما تعلمو بيعصب وبيقول : حيرتونا وهلكتونا مو إنتو يلي ضليتو تقولو العلم في الصغر كالنقش على الحجر؟؟ ومو إنتو فهمتونا إنو من طلب العلا سهر الليالي!!

يارا شماع