إلى محمود درويش
ارسل مساهمة
 
اتصل بنا

نشرة هلوسات البريدية

بعض مزودات البريد المجاني تصنف النشرات البريدية على أنها spam أو junk أو bulk (بريد غير مرغوب). إن لم تجد النشرة في بريدك الوارد فتأكد من وجودها في مجلد البريد الغير مرغوب.
في سورية
البداية arrow تناقضات آدم arrow موقف باص arrow بالبلدي ...( هلوسة سك ) ..؟!
بالبلدي ...( هلوسة سك ) ..؟! Print E-mail
31 أيار 2008 الساعة 18:08
بقلم: خليل صارم 
 
اذا كان بدك تكتب ..لازم تنفعل ..تعيش نفس الجو .. الحالة ..البيئة ...الحدث وبيكون أحسن اذا بتشارك بالحدث . مش لازم تتخيل كتير.. وهيك بتطلع معك الصورة صادقة ..لأ ..حلو الكلام ...ياحبييييبي ..!!.
يعني اذا بدك تكتب عن الاستعمار لازم تشارك باستعمار شي بلد وهيك بيصيركل الجيش الأمريكي بالعراق كتاب وأدباء وباحثين .. حلو هالكلام .!!.واذا بدك تكتب عن الصهيونية  لازم تنتسب وتصير ماسوني .. صهيوني ..أحلى وأحليين ..!!. طيب واذا بدك تكتب عن اللي بالي بالك ..؟
- . شوقصدك .؟.
لأ مش قصدي  ياعزيزي .. بس اذا بدك تكتب عن الفساد لازم تصير فاسد ..وعن الحرامية ..لازم تصير حرامي .. يعني كل الكتاب ..جربوا ..؟. لأ وقال بيقللي سكران .. بربك ياأخينا مين فينا السكران ..؟!!  وكمان ألعن وألعنين .. واذا بدك تكتب عن  اللي ..؟؟؟.... ؟

- . شوقصدك يعني ..شو رأيك يمكن تكون الكاتبة ..؟؟؟.. عملتها ...أي روح عنا ..ياااااا . . مشيها طق حنك وعلااااك وكيف ماإجت تجي ...  أحسن ..؟ قال ... بدك تعيش الحالة ...قال . !!
في إحدى المرات قررت أن أقلد الطريقة الصهيونية ..وهي أن تجمع كلمات منمقة ومصطلحات صعبة ..ولامانع من ابتداع مصطلحات على كيفك .. بتطلع بأربعماية صفحة  بتخلي القاريء يدوخ ومايبعرف شوبدك ولوين بدك توصل ..!!. أي ..وبعدين .؟. ولاك صدقني عملتها .. وطلعت معي مقالة غير شكل  ..كنت أعيد قرائتها وأضحك ..؟ والمصيبة انها نالت إعجاباً غير طبيعي .. عدد من القراء أرسلوا ايميلات  معجبين بها .. لأ .. المضحك أكثر .. أن أحدهم طلب مني على النت بكل أدب  وهو يعتقد انني أحمل دزينة من شهادات الدكتوراه في كافة أنواع الأدب والتخصصات والاختصاصات  وربما اعتقد انني باحث لايشق له غبار .. طلب مني الأخ بعض التوضيحات وأردفها بطلب أن أشرح له بعض الأمور لأنه يقوم بتحضير رسالة ماجستير ..!! . والحقيقة انني لاأعرف كيف أوضح له غايتي من المقالة السوريالية الحداثوية الهمشرية الهمايونية  التي لاأدري كيف جمعت مصطلحاتها . !!
..أيوه ..وبعدين .. ؟ شو بعدين . اعتذرت لضيق الوقت ..!! حلو ..وبعدين .. ؟ بعدين..بعدين ..
- . بعدين ..بعدين ..شو راكبك قرد اسمو بعدين ..؟!
 الرجل ماعاد  اتصل ولا سأل .. يمكن اعتقد انني  أحمل هموم الأمة العربية المجيدة والاحق انتصاراتها  الكاسحة في كافة الميادين العلمية والاجتماعية والسياسية والاقتصادية وكيف سأقوم بإنارة الثقوب السوداء في الفضاء . والحقيقة انني كنت افكر في تعبيد هذه الثقوب السوداء وكيف سأملأها بالمطبات على طريقتنا  وبدون اشارات حتى يخبط المسبار الفضائي  ووينك يامنطقة صناعية.. أي  شو بس وحدنا  بيكون عنا مطبات .؟. خلي العالم يتعرف على منجزاتنا المطباتية.
-       قال الحكومة قبل ماترفع سعر المازوت بكام شهر انذرت الناس ..؟ لكااان ياعمي لكااان ..الحكومة مابتحب الكذب .!!. وهات بعدها ياتخزين مازوت .. قالولي ان هناك من ملأوا مسابح البيوت بالمازوت .. والبيدونات البلاستيك ارتفعت أسعارها بسبب الاقبال على شرائها لتخزين المازوت ... أيوه ..صحيح .!!.بدي قووووول ليش هالزحمة اللي كانت على المحطات ..؟
-       !!. هلق عرفت ..صح النوم .!!.
-       . أي شو بيعرفني ..لو كنت بعرف هيك بدو يصير .. كنت عملت متل أمريكا ..اشتريت مازوت وخزنته بالأرض ..ياخسارة راحت علينا ...مش متل هداك الفهلوي اللي كمشوا عندوه اكتر من تمانين مليون ليتر .. بس قالوا عنو مدعوم .. ماعملوا معو شي ..؟ العمى ضربو شو فاتح سادكوب لحسابو .. ؟.. هيك صار والله يستر عاللي بيستر .
-       قالوا بإدلب الناس دخلوا بصراعات ومشاجرات منشان الخبز ..والقصة فيها جرحى ومصابين ..!!
  مش معقول ..؟ .
  - الله وكيلك هيك صار ... شي بيحير بس عنا القمح خير الله .. !! ولك ياعمي القصة مش قصة نقص .. بس معلومك  هالسنة أمحلت بالبادية ومانزل مطر .. ارتفعت أسعار العلف ..صار الكيلو بأربعه وعشرين ليرة ..وربطة الخبز بخمسةعشر ليرة ..احسبها بقى على كيفك ..؟!!  صارت الناس تشتري الخبز وتشمسو حتى يصير يابس ويبيعوه علف ..إي شو المازوت أحسن ..ومعلومك السوري تاجر بطبيعته ..بيعرف من وين بياكل الكتف ...ولاااااك والباط والفخده والفتيلة وبيكمل عالقشة والراس كمان ..؟ . لأ.لأ.لأ ..مش كل الشعب ..ماعدا اللي مش طالع بإيدو شي ..؟ .
-  .. آآآآآههه ..هلق فهمت ..!! .. ولاك شو قصتك يازلمة ..كل شي عندك هلق فهمت ..شو مانك عايش بهالبلد .. دخلك سؤال صغير كتير ..كيف صرت مدير  ..؟!!.  ياعيني اذا كانت الحكومة كلها متل سيادتك ..!! قوم خلصنا ووقعلنا هالمعاملة خلينا نمشي .
معاملة ..آآآه .. ممممم .. وصيناك  على كام قنينة ويسكي من كام يوم ..شو.. نسيت ..؟  كام قنينة .. !! دخيلك خدلك هالألف ليرة واشتريها لحالك ..
-  هيك قولك ..هاتها ..ماشي الحال ..كررررمالك
أكيد مالي كر ومالي جحش ..وقع..وقع.. خلصنا .. أحسن ماتكبر الحكاية ويصير بدك تتعشى بشي مقصف . ...
-  خود الله معك .. هات الله لايكون معك ولا مع اللي حطك هون .. باي .
هاي ياأخونا ..انفعلنا ..وعشنا الجو .. شو رأيك بهالحكي .. عندك شي حدا يسمعو ويفهمو..ومايحسبها هلوسة عن جد  واللا ليش يتعبو حالن .. طنشوا ياشباب ..ماشي الحال .
-       الله كريم ..طول بالك ..وبكرا بتشوف .. ؟ ايمتى بكرا .. بعد شهر ..سنة ..خطة خمسية ..عشرية .. دخيلك الفساد بدو خطط ودراسة ..؟ !!!
- شو بدنا بهالحكي اللي مابيجيب نتيجة ..شو رأيك تعا لنحكي سياسة ..- تفضل ياخيي احكي .. طيب بتصدق واللا لأ أنا امبارح وجعني قلبي على جعجع .. كان متل الديك المخصي بيقاقي ومابيطلع معو شي  ..ياخطيتو ماكان عم يطلع معو الحكي تمام ..كان فايت ببعضو .. الحقيقة وجعني قلبي عليه .
العمى بقلبك ..صحيح وجعك قلبك .. ليش ماشفت دكتور قلبية بلكي كانت بوادر جلطة ..؟!! ولاك لاه..لاه..مش قصدي ..يعني شغلة عاطفة ..
قلتلي عاطفة .. آه ياحنون .. ولو ضبطت مع هالديك المخصي  شو كان صار بقلبك .. مش كنت بكيت من القهر ..وكان جوجو  هلق عم يترغل بالعبري .
لاولووووه مش لهالدرجة ..؟!! .. أي سد بوزك أحسنلك ..قال بدو يحكي سياسة قال . . روح دورلك عاشي محطة بورنو وهيك بترتفع ثقافتك السياسية .. قال حنون ..قال . . تضرب بنيعك ملا محاورة .
- هلق هيك الديمقراطية ..ماعندك جواب إلا.. سد بوزك ..
يرحم ابوك لاتنرفزني شو هالديمقراطية ..وين كانت الديمقراطية لما كان هالهبل  مفرعنين وياأرض اشتدي .. مبارح كان بدهم يحرقوا الأخضر واليابس .. ولاااااك ..لااااه غلط .. قال بدو يحرق الأبيض والأخضر ورجع صلح .. الله أعلم كان طارقلو شمة أبيض  حتى اتلخبط  وصار يفكر من صباطو . . دخيلك مااشفتو وسمعتو ..؟ أي شفتو وسمعتو ..
طيب وين كانت هالحنيه ياغالي .. وين كانت الديمقراطية ..؟ .. مش اذا سديت بوزك أحسن .
-       طيب شو رأيك بزيارة هالبوش للمنطقة ..؟
... حل عنا ..يااااا  .. مش مكفينا مهابيل المنطقة حتى تكمل بهالأهبل ..!!!.
أي ..شبو بوش والله على سلامتو  .. مافي واحد شرشح أمريكا متلو .. بدل مالازم نشكرو.. منقوم منحكي عليه ..والله نحنا مابيعجبنا العجب ..؟.
ولااااك ياأهبل ..ياديمقراطي .. ليش بوش شرشح أمريكا منشاننا واللا منشان اسرائيل .. ؟.

هلوسات - سورية - مجتمع - ثقافة - منتديات

تعليقات الزوار - لن ينشر أي تعليق فيه شخصنة أو عنصرية أو طائفية أو تحريض على العنف أو خارج عن أدب الحوار

هلوسات - سورية - مجتمع - ثقافة - منتديات

كتب: زائر في 2008-06-17 00:35:10
أنت يازميلنا الافتراضي (خليل)تمسكُ كاميرا ديجتال عالية الدقة قد تكون دقَتها 5 -7 ميغابكسل ,وتصوِر الواقع كما هوَ معروض حرفيَاً في أذهانِ خلقِ الله القارئين مقالاتِكَ ,والَتي تتخذُ في عرضها لغةً يوميَةً قريبةً إلى أفئدتنا ,بعيدةً عن القواعدِ القاعدةِ على كرسي مدولب ,وهيَ تحديداً أسلوبُ ذوي الاختصاص , والسؤالُ الَذي أطرحهُ عليك:هل باستطاعتكَ إيجاد حلولٍ قريبةٍإلى دماغِ ومعدةِ وفؤادِ وجلدِ المتلَقي ؟؟؟؟؟؟؟؟؟؟؟أو إيجادِالبلسم الشافي لمئات بل لآلاف الأوجاع والآلام الَتي تسلط أنتَ الأضواءَ عليها؟؟؟؟؟؟؟؟ 
والحقيقةُ قد أتوقُ لقراءةِ مقالاً من مقالاتك الغزيرةِ والمتشابهة جدَاً في طريقة العرض والأسلوب ,لعلَي أراهُ برداً وسلاماً على النفوس ,لكنَي سرعانَ ما أشعرُ بارتفاعٍ أو انخفاضٍ في الضغطِ !!لاأدري بالضبط كنه الحالةِ الَتي تنتابني لا سيَما أنَ أعراضهمامتشابهه ,وقد يكون السبب لهذهِ الأعراض المرضيَة :حشدٌ وكمٌ هائلٌ منَ الصور الديجتالية العالية الدَقةوالمؤلمة لشدَةِ وضوحهافي دماغي والَتي ترفدُ ما تجمَعَ من مثيلاتها عبرَ متابعتي لما يكتب ولما يُسمع ويُقرأُ حولَ كلِ ما يدورُ وما يحصل في العالم العربي وغير العربي , في وطني الصغير والكبير ,في كرتي الأرضيَةِ ..والحقيقة الَتي لا جدالَ فيها أنَ (البطنةَ تُذهبُ بالفطنةِ ) وأننا لو جمعنا أبطالَ صوركَ الديجتاليَةِ الواقعيَةِ والعاليَةِ الدَقة ,وحمَلناهم المسؤوليَةَ وأنا وأنتَ وجميع أبناءِ بجدتنا من هؤلاءِ الأبطالِ ,لوجدنا أنَ النفوس ستفسدُ بعدَ امتلاءِ الجيوبِ !!!!!!!!!!!!!!!!!أمل محمود

هلوسات - سورية - مجتمع - ثقافة - منتديات

كتب: زائر في 2008-06-21 00:23:31
سيدتي المحترمة : لست افتراضياً وهذا هو اسمي الحقيقي ..ماعلينا . 
سيدتي .. ابتسمي فأنت عربية تعيش فيالعالم العربي السعيد جدا ً..جداً ..وكمان جداً .. ولهذا فإن الحلول تنتج مشاكل جديدة تحتاج لحلول جديدة ..ثم ..اتبعي اشارات المرور ..وهكذا ينتهي الطريق في وادي لاقرار له 
- الأكيد أن النفوس ستفسد بعد امتلاء الجيوب .. المشكل هو كيف امتلأت الجيوب .؟. اذاً النفوس فاسدة قبل الامتلاء أو انها جاهزة لاستقبال الفساد بسهولة ..مهيأة ..وهذا ناتج ثقافة كلنا نشارك فيها لأننا تنفسنا مع أول طلقة من طلقات الولادة .  
الحلول ..سهلة وبسيطة .. ومن يتعرف على المرض لايمكن قبول استمرار توجعه لأن الدواء يصبح معروفاً ببساطة  
الأمر يحتاج فقط للذهاب الى الصيدلية أو المختص لاجراء الجراحة ..حسب الحال .  
أرجو أن أكون قد فهمت قصدك والا فأنا أعتذر .  
مع التحية .  
الاسم