|
|
  |
| مواقع سورية |
|---|
البداية 
مرصد الطائفية موقف باص شوية هلوسة كمان :( الصبر مفتاح الفرج ) ..؟!! .
مرصد الطائفية موقف باص شوية هلوسة كمان :( الصبر مفتاح الفرج ) ..؟!! . | شوية هلوسة كمان :( الصبر مفتاح الفرج ) ..؟!! . |
|
|
| هلوسات - موقف باص | ||||
| 25 حزيران 2008 الساعة 20:48 | ||||
|
بقلم: خليل صارم - سوريا  ياحبيبي ..ياعيني ..ياروحي .. والله مثل مانك شايف ..مش فاضي أبداً ..شو ماعندي غيرك .. ؟!شوف الناس كيف متجمعة فوق راسي .. ..ولكني منذ أكثر من شهر وأنا أراجعك وأسمع نفس الموال ..؟!!!!. مش طالع بإيدي شي ..مثل مانك شايف . .. أنت تقول نفس الكلام للجميع .. ولاتفعل شيئاً .. لم أشاهد أحداً .. يعود وبيده معاملته .؟! يابشوفك عم تشرب قهوة ياإما عم تحكي مع شي ضيف .؟ شو إنت ربي حتى تحاسبني .. أرجوك لاتعطلني عن عملي . ..ولكنك لاتفعل شيئاً سوى ترديد نفس العذر والتعابير والجمل لكل المراجعين .؟!!!!!. لأ حلو والله ... هيدا اللي ناقصنا . !. أنا مش موظف عندك . .. دخيلك ..قوللي انت عند مين موظف ..؟. شو يعني عم تمزح معي .. أنا موظف عند الحكومة ..وهي المسؤولة عني ..وهي اللي بتحاسبني .. ايوه .. تمام .. ممكن سيادتك تدلنا على الحكومة حتى نروح ونراجعها ..؟. اذهب لعند المدير ..الوزير.. مجلس الشعب .. روح لعندو ..؟!!. .. باينتك مدعوم كتير .. ومش سائل .؟!! اعمل مابدالك .. بلط البحر .. ؟. .. بدي العن أبوك على ابو اللي وظفوك .. على ابو اللي داعمينك ..ياإبن ..ستين ألف كلب . * اتصال هاتفي .. وصلت الشرطة .. اودع المراجع السجن .. والتهمة اعتداء على موظف أثناء تأديته عمله ..؟ . المشكلة ليست هنا ..المشكلة هل كان هذا الموظف يؤدي عمله ..؟!! المشكلة هي ..من يستحق السجن .؟!! ( الحادثة افتراضية , لكن هذا النقاش يدور يومياً ولأسباب أخرى وبشكل أسوأ ). يقولون لك القانون .. أي قانون ..هذا ..؟ .. أي كمنجة .. أي طبل بلدي ..؟!! قال قانون ..قال . عليك أن تتحمل ..تصبر.. الصبر مفتاح الفرج ..؟ . ولكن أين هو (فرج) هذا .؟. تولد أجيال ..و..تموت أجيال .. وفرج أفندي لم يصل بعد ..؟!! مش عجيبة .؟!!. الناس تولد وتموت ..وفرج مايزال شاباً ..نحلم بطلعته البهية .. ونرسم له صوراً جميلة كفنان مشهور .. يسبي بتسبيلة عيونه قلوب الجميلات ..ويحلم بتقليده المراهقون .. وكأنه مارلون براندو في أيام عزه وشبابه .. أو آلان ديلون .. واللا بالعربي عبد الحليم حافظ ( الله يرحمو) أو عمرو دياب . واللا ..واللا . وينك يافرج .. الناس بدها تشوفك يافرج .. ياترى شو صاير معك يافرج .؟؟. ماتكون علقان مع شي موظف وحابسينك يافرج .. بس العقوبة ثلاثة أشهر يافرج ..يعني كان لازم نتمتع بطلعتك البهية من زمان يافرج . من خمسين ستة يافرج .؟ . شو قصتك يافرج ..؟ . وفرج راسو كبير .. تقيل .. بيعرف انو مطلوب . والناس كلها بتقول بكره بيجي الفرج .لذلك عم يتدلل . لابكره إجا ولا فرج إجا .!!. الله لايكون جاب الغلا يافرج ..؟ . يلعن الساعة اللي انتظرناك فيها يافرج .؟. والحقيقة ان الناس اللي عن جد .. لما بتعتمد على حالها بتنفرج معها فوراً , ولكن شوبدنا نعمل مع هالناس اللي بتقعد تدعي وتتوسل وتعيش بالأمل والنتيجة بتفوت بالحيط .. صارلنا أكثر من خمسين سنة وأئمة الجوامع وخلفهم المصلين في كل صلاة جمعة وهم يدعون على اسرائيل والأعداء .. ( اللهم شتت شملهم ..اللهم نكس أعلامهم ) ونحنا عم ناكل قتل عالطالع وعالنازل . ونحنا اللي عم يتشتت شملنا وعم تتنكس أعلامنا . ولما ضبطت معنا وطعميناهم أول قتلة وثاني قتلة على إيد المقاومة في الجنوب اللبناني .. مع شوية سحاسيح في غزة .. انقلبت شلة من اللي عاملين حالهم مؤمنين وصاروا يدعوا عالمقاومة .. أتاري كان دعاؤهم على اسرائيل نفاق بنفاق .. وطلعوا من جوا القلب عم يدعوا لأسرائيل مش عليها .. أتاري رب العالمين بيجيب العكس لدعاء هيك منافقين . وهيك انكشفوا ومابقى شي يسترهم ..الله وكيلك عاملين ستربتيز ..بس مناظر ..شي بيقرف ..عينك ماتشوف .. ومع كل هيك عم بيحاولوا يتستروا بالدين من جديد ويبدأوا يعيدوا مواويلهم علينا . مالك بالطويل .. بيرجع مرجوعنا لفرج . صدقوني طلع فرج .. مسؤول عربي.. بدو يحلها بس مش فاضي ..؟ هيك بيقولوا المسؤولين العرب .. مش فاضيين ..والحقيقة انهم مش عارفين شي من شي .. قال بيقولوا إنو القضايا الكبيرة والعظيمة عم تلهيهم .. وفرج أفندي عم يبحث عن حل للقضية الفلسطينية ..والأرتيرية ..والصومالية ..والجزائرية ..والعراقية .. وقضية سبتة ومليلة المغربية . ومشاكل موريتانيا . وقضية الحكومة اللبنانية اللي بدهم يخلوها تولد ابتداء من القدمين على عكس الناس .. ويمكن لسه قدامو مفاجآت .. يمكن يخلقولو ..كومة قضايا جديدة ..أتاري هيدا الاستعمار ابن كلب .. ابن حرام .. عاملنا شغلتو وعملتو .. تارك الله وعابدنا .. كل يوم بيعملنا قصة جديدة .. وتعا حلها من جديد وفكر فيها .. بس السؤال هو .. هلق حقيقة انتو عم تفكروا بالحل .. ؟والله أنا مش مصدق ..والمتل بيقول اللي كبر الحجر ماضرب .؟ نيالكم ياعم الله باعتلكم هالاستعمار بتحملوه تخبيصاتكم وقلة عقولكم ..ومابدنا نقول أكتر من هيك . .. أي العمى ضربك مانك شايف .. الشباب ماسكين الكلمات المتقاطعة ونازلين فيها حل .. بس كل يوم في مجلات وجرايد جديدة وعلى كلمات متقاطعة جديدة ..مساكين الشباب ماعم يلحقوا حل كلمات متقاطعة .. وكمان ناطرين فرج .؟!! .. الله واكبر ياعمي .. هلق لأيمتى بدنا نظل ناطرين فرج أفندي .. اذا كلنا ناطرينوا ..مين بدو يحلها .. طيب ماتكون السي آي إيه خاطفينوا . وحاطينوا بشي سجن سري .وماعم يقولوا الحقيقة .. يمكن رامبويات العرب كامشينو على الحدود بالغلط حسب العادة وبكره بعد شي قرن من الزمان بيفتحوا معو تحقيق حتى يعرفوا كيف دخل السجن . ولأنو مابيعرف السبب .. بيعتبروه عم يتشاطر عليهم ..بيقوموا بيلعنوا أبو اللي خلفو حتى يعترف ..ويمكن يعترف بشي قصة مش عالبال .. بيرجعوا بعدها بيحكموه من جديد . . وهيك .. ابتسم فأنت عربي .؟. مش أحسن مايكون الله خلقك عند هالكفار وهيك بتطلع عينك ومابتشوف الجنة .!! . ياعمي نحنا كلنا رايحين عالجنة .!!. قلتلي ليش .؟. أولا ً لأننا عرب .؟!! ( لاتضحك ) .ثانياً لأننا مؤمنين .( حط تحتها تلات خطوط ) . ثالثاً لأننا صبورين أكتر من الحمير .. وهون بيت القصيد . نحنا صابرين على اسرائيل اللي بتضرب وبتقتل وبتحاصر وبتعمل العمايل .!!. ونحنا صابرين على أمريكا اللي بدها تقطعنا فوق مانحنا مقطعين ..وبدنا نشوف لوين بدها توصل .؟ .ونحنا صابرين على الحرامية والفاسدين وكمان ناطرين لوين بدها توصل أرقامهم ..؟. ونحنا صابرين عالحكام اللي عم يتحالفوا مع أمريكا ضدنا .. وبدنا نشوف لوين بدها توصل معاهم .؟؟. ونحنا صابرين عالغلاء ..وأزمة السكن ..والبطالة .. وعلى التيوس ..وصابرين على الصبر .. بس بدنا نعرف لوين بدها توصل .؟؟؟؟. ولما بتوصل ..مابيبقى منا مين يسأل .. وهيك منرجع نبلش من جديد . !!! ومنوقف على المفارق ناطرين فرج .. والخوف يطلع فرج حامل الجنسية الأمريكانا وعيونو على رئاستها .. ساعتها شو بدنا نعمل . متل هيدا أوباما اللي من كينيا . قال راح كملها وأعلن الولاء للصهيونية على منبر إيباك ؟!! شو بدنا نعمل ..؟ - .. ماراح نعمل شي ... كاسك ..وكاس الأمة العربية ... هاي مام ..ويك أب . .. البوي فرند الأمريكانا إجا لعنا من اسرائيل عدل .. وطرق رقصة منشان يتمرن على ليلة العرس . ... شو الحل برأيك ..؟ - .. بسيطة ..لازم ننسى فرج وبالناقص منو .. لأنو نحنا اللي منعمل فرج ونقعد نرسموا على كيفنا ومن قلب العجز ..والعاجز هواللي بيعيش على الأمل . . المشكلة فينا .. المشكلة بهالشعوب .. قال بتنتظر فرج ومنسكر كل الطرقات اللي بدو يجي عليها .. بيقوم فرج بيروح عالصين وعلى اليابان وعلى روسيا .. وعلى أوربا الشرقية .. ومابيعود يفكر يجي لهون . ولاك والله بكره بدو يروح على بنغلاديش وماراح يجي لعنا . دخيلك شو بدو يعمل هون .؟!!. الحقيقة ماإلو شغل عنا واذا كان في شغل منقوم نحنا ومنخربوا . والبركة نحنا صرنا أكثر من عشرين زريبة على مين بدو يرد فرج حتى يرد . ؟!!! ... يعني انت مفكر تعملهم زريبة واحدة ..؟!! . - لاياعمي ..مش طالع بالإيد .. بس على الأقل زريبة واحدة تبدأ .. وتحسن أحوالها وتعمل نموذج للباقي , وهيك بيوصل فرج .. ويمكن ماحدا يحتاج فرج . ... هلق على إيش عم تتقاتل هالزرايب العربية ..وليش مختلفين بين بعضهم البعض على طول . ؟!! . - آآآآخ ياخيييي .. يعني مابتعرف .. كل واحد فيهم ماسك عظمة بسنانو ومفكر انو التاني بدو ياخدها منو . بس للأمريكي بيتركها وبيغمغم بين رجليه . ومش سائلين على هالغنم .. لأ وفوقها بيجي شي ابن حرام من برا وبيقعد يوشوشهم ..ولك دير بالك حاطين عينهم عليك .. بيقوم أخينا بيدير بالو وبيبلش الغلط بين بعضهم ..والغنم حواليهم عم بيمعي .. بيكون عطشان وجوعان وملعون أفطاسو .. وهم ..بيفكروا انو الغنم عم يهتف لهم . لأ وبيقولوا انهم عم يتقاتلوا عالسما ..وهم عم يخسروا الأرض مانك شايف كيف عم تضيع زريبة ورا زريبة . . وهلق عم يضحكوا علينا قال كلهم بدهم يعملوا ديمقراطية ونحنا عم نصفق متل الهبل .. قال فرحانين ومصدقين يابعدي . !!. بعد كل هالعمر وبعد ماصار الكوبوي بالعراق بجهود وهمة الشباب والباشوات والبرنس والسوبر كينغ ..فجأة صحيوا عالديمقراطية وطلعوا هم أمها وأبوها . ... دخيلك ايمتى بدنا نصير متل خلق الله ..؟!! - بسيطة ..عد على أصابعك ..؟ • لما منشوف شوفي قدامنا وبين رجلينا ومامنفكر شوفي بالسما قبل مانحلها عالأرض . • لما مامنسكت عاللي بيسرقونا ومامنقول تركها لربك أو يصطفلوا مادخلنا . • لما مانستنى واحد يصفق حتى نصفق وراه متل الهبل ومش عارفين ليش عم يصفق . • لما منسأل السمان والبقال والفران وسائق التكسي عن سبب رفع السعر وطلب الزيادة ومنرفض ندفعلهم على كيفهم . • لما منبطل نترجى الموظف والمدير والمسؤول منشان حقوقنا ونطالبه بها غصب عن عين اللي عينوه . • لما منوقف بالدور بانتظام .؟ • لما منوقف كلنا ضد جرائم الشرف الكاذبة واللي هي حقيقة ماإلها علاقة بالشرف ويمكن يكون فيها قلة شرف ونتوقف عن التصفيق للقاتل ونطالب بإعدامه . • لما منتوقف عن مزاعم الإيمان المنافق ومنتوقف نعمل مظاهرات أمام الجامع وعند السفر والعودة من الحج وعن تمنين خلق الله بصيامنا وصلاتنا وحجنا . • لما منتوقف عن البكاء والتمثيل المنافق على راس الميت ولما منرجع من الدفن منتقاتل على الورثة . أو منشرب قهوة التعزية ومنسب عليه . • لما منبطل نضرب الولد لأنو عم يدخن ونحنا حاطين السيكارة بين شفايفنا . • لما منتوقف عن نصيحة الأولاد وضربهم والزامهم بلائحة طويلة ولاتنتهي للعيب بينما نحن منكون عم نمارس كل الموبقات والعيوب . • لما مامنروح ندور على حزب بالجبهة لننتسب اليه منشان ندبر راسنا واحنا مش مقتنعين ببرنامج هذا الحزب . • لما منعترف بأخطائنا قبل مانحاسب غيرنا . • لما مامنسكت على ممارسات المسؤول الحرامي ونتوقف عن لعن أبو الفقير ومطاردته لأنه ماقال للحرامي ياسيدنا . • لما منقول للقاضي المرتشي والمسؤول المرتشي وكل فاسد .. أنه فاسد وابن ستين ألف كلب . • لما منعرف كيف نحتج على الخطأ والتجاوز والانحراف وتعطيل القانون والتلاعب بالقانون , ونرفض وضع الحمار مكان الانسان . ومنبطل نسمع للعاهر وهو يحاضر عن الشرف والفضيلة ونرد عليه ونقول له ..انزل عن المنصة ياعاهر . • ولما ..ولما ..ولما .. بتحب كمل واللا بيكفي اليوم . - لأ بيكفي .. ممكن تعطيني حبتين اسبرين ..!!. .. آسف مافي اسبرين الا تهريب وخالصة مدة الصلاحية ..بينفع .؟ .
|
||||
          |
| RSS Feeds |
|---|
|
روابط XML
|
| مواقع مهمة |
|---|