هلوسات سورية أخبار مجتمع ثقافة منتديات
| إلى محمود درويش |
|---|
  |
| نشرة هلوسات البريدية |
|---|
|
بعض مزودات البريد المجاني تصنف النشرات البريدية على أنها spam أو junk أو bulk (بريد غير مرغوب). إن لم تجد النشرة في بريدك الوارد فتأكد من وجودها في مجلد البريد الغير مرغوب. |
| موقف باص |
|---|
| هلوسة كافيهميت ( بدك الصراحة ) .؟!! |
|
|
| هلوسات - موقف باص | |||||||||
| 03 تموز 2008 الساعة 19:26 | |||||||||
|
بقلم: خليل صارم - سوريا  بدك الصراحة ..؟- هات ..ياليت تكون صراحة بجد . الحقيقة مافي عنا فساد .؟ - كذاب . الله يخرب بيتك على هيك صراحة .!! لأ ياسيدي أنا مش كذاب .. روح اقرا عن الفساد في بوركينا فاسو وفي تشاد وفي بورما وبنغلاديش وطاجيكستان وبعدين راح تعرف انو مافي عنا فساد . - الله لايعطيك عافيه على هيك مقارنة .. ولاك شو القصة .؟!. ماتكون موعود بشي منصب .. وعم تحضر حالك وتفرجينا قدرتك عالإقناع .. العمى ضربك ماحدا سبقك على هيك مقارنة غير هالشوية مسؤولين اللي عنا . . بترتفع الأسعار عنا وبيقولوا لسانا أرخص من طوكيو وأرخص من نيويورك .. قال من قد ماهني شاطرين بيقرشوها عالدولار . . وكأنه الدخل عنا متساوي مع الدخل بأمريكا وباليابان . أو كأنه عنا ضمانات للمواطن ؟!! .. بيحكوا عالأمان بالبلد .. مع انو الشباب نزلوا بالحمار طق حتى يعترف انو أرنب . لأ وبيقولولك شوف المسلسلات الأمريكية .. وبيسألوك ..ماعم تسمع شو صار ببورندي وانغولا .؟. ولما منعوف سمانا من شي مسؤول حرامي .. بيقوموا بيجيبولنا ألعن منه .. منشان نترحم عاللي قبله ونسد بوزنا وماعاد نحكي . شوقصدك يعني .. هلق المجالس البلدية هيك ..ومجلس الشعب هيك ..مش أحسن من اللي قبلهم .؟ - لأ سيدي مش أحسن من اللي قبلهم أبداً ..بتحداك انك تثبت انهم أحسن . ولا حتى مثلهم . يمكن يلتقى واحد واللا اثنين بالكثير بكل محافظة ..مش أكتر من هيك ..؟ يعني ..؟ . - يعني .. هزي يانواعم ..و..انخلي ياهلالة . . وهيك صارلنا على هالحالة من يوم يومنا وطول عمرك يازبيبة ....؟ وبدهم يظلوا يغشونا ويغشوه .. !!!. شو السبب برأيك ..؟ - والله ياعمي هيدا هو اللغز اللي ماإلو حل .. (هو ) .. بيوجه لمكافحة الفساد والإهتمام بالمواطن وحقوق المواطن وضرورة التغيير الى الأحسن .. بيقوموا بيشتغلوا العكس .. وبيجيبوا ناس أسوأ من غيرهم وكأنهم بدهم يخلوه ييأس أكتر منا .. بصراحة وكأنهم عم بيفهموه انو مافي أحسن من هيك ..؟. بتتذكر قبل أكتر من عشرين سنة طلع علينا الفاسدين بكلام غريب عجيب .. قالوا ..انهم من وين بدهم يجيبوا مدراء ومسؤولين كويسين ..شو بيستوردوا من سويسرا..؟ . هيك قالوا ..!! ونحنا صرنا نرددها بكل غباء وكأننا اكتشفنا الفضاء ياخي ..؟ !! والحقيقة انو الفاسدين بدهم يرسخوا عنا هيك قناعة ..وهيك بقي كل شي على حالو. حتى الرئيس بزمانو اقتنع وصار يحكيها (على ذمة بعض المسؤولين اللي طلعوا الإشاعة ) . والحقيقة انهم ابعدوا الشرفاء وقطعوا عنهم الكهربا حتى يبقوا بالعتمة وماحدا يشوفهم ..وهلق عم يكرروا نفس اللعبة اللي نجحت معهم بالأول .. !! . طيب مش شايفين انو الأكثرية المطلقة (معه) ومع كل كلمة بيحكيها .. معناها انو الحرامية هم الأقلية المطلقة .. والناس عندها قدرة على التمييز .. بس الحرامية ياعمي بإيدهم الطبل والزمر والميكروفونات والهتافين ولعيبة الكشاتبين والمانيكانات اللي بيقعدوا بأول صف وبيطلعوا بالصورة ..ومنشان هيك عم يغطوا على الأوادم ويضيعوا أصواتهم . معقول هالكلام .. لها الدرجة وصلت معهم ..؟!! . - ليش مش معقول ..مش انت قلت بدك الصراحة ..هيدي هي الصراحة .. الحقيقة صاير معنا مع هالمسؤولين متل الأمم المتحدة .. لما بترفض دولة عربية اقتراحاتها العورة والحولة والمنافقة ..بيقوموا يستنفروا وبيعقدوا جلسات وبياخدوا قرارات .. متل ماصار مع السودان بدارفور .. طلبوا يبعتوا مراقبين وقوات امم فايته ببعض .. ولما رفضت السودان قاموا طرقوها قرارات ..والحقيقة عينهم عالثروات اللي بدارفور ومش مهتمين بالإنسان وحقوق الانسان .. ولما اسرائيل بترفض دخول لجنة من الأمم المتحدة الى الضفة وقطاع غزة .. ماحدا بيحكي ..ولك حتى العرب ماحكوا وسدوا بوزهم ,.. كونداليزا ..بتقول عالفضائيات انو الاستيطان بيعرقل السلام وبتغمز بعينها لأزلامها العرب ..ولما بيطالبوا باتخاذ قرار بإدانة الاستيطان بالأمم المتحدة بيقوم المندوب الأمريكي بيعطل الجلسة .. ورغم هيك هالهبل العرب بيركضوا عالأمم اللي فايته ببعض منشان تنصفهم ..؟!! . ولك ياعمي فرجيني موقف واحد من هالأمم اللي بيقولوا متحدة ..لصالح العرب .. ؟!! بينما اسرائيل بتعتدي وبترتكب المجازر اللي بيخجل منهم هولاكو وهتلر وماحدا بيتحرك .. لأ والأسوأ بيقولوا انها دفاع عن النفس .. وبيطلع الفلسطينيين اللي عم ينبادوا معتدين .. مع ان أرضهم منهوبة وأطفالهم اللي عم بيموتوا .. بربك فيه ندالة بالعالم أبشع من ندالة الأنظمة العربية .. ومنشان ندالتهم كافأوهم وسموهم معتدلين ..؟ . ملعون أبو هيك إعتدال .. أي شو هالزمن ياااااا .. الخسيس والجبان والعميل والندل والمجرم الحقير صار معتدل ..!! ..واللي بيدافع عن أرضه وأطفاله وحياته صار إسمه إرهابي . ومنشان تكون جيد ..لازم تسلم أسلحتك .. وتستسلم ..وتتعرى قدامهم وقدام إسرائيل وماترفع ايدك منشان تحمي نفسك ..؟ . ولك لأ ياعزيزي ..بس العالم صار بدو السلام . - هلق هيك السلام بيكون .. ملعون أبوهم على أبو سلامهم .. ؟. ولك صحيح بدي إسأل .. دخلك ليش أمين الجميل زعلان من تبادل الأسرى ,, وقال أنو خرق للدستور والسيادة اللبنانية .. مش شي بيحير .!!. مع انو كل اللبنانيين مبسوطين .. حتى اللي واقفين ضد المقاومة قالوا انهم مبسوطين ..؟!! شو برأيك ..ليش زعلان أمين بيك الجميل ..؟. - الحقيقة إنو خايف ماتنكشف فضيحة قتل الديبلوماسيين الايرانيين على حقيقتها . وهيك بتنفتح كل الملفات .. صارلها الكتائب والقوات اكثر من عشرين سنة بيقولوا انوسلموهم لأسرائيل .. وجعجع بعظمة لسانو قال انو سلمهم لأسرائيل .. وعند التبادل الأخير ..اللي بدو يصير بعد كام يوم قالت اسرائيل خطياً انهم قتلوا في لبنان ودفنوا في لبنان .. وكان يومها أمين الجميل رئيس للبنان ورئيس للكتائب ..؟ . المعنى أنو هو وجعجع اللي قتلوهم بناء على تعليمات إسرائيلية وهيك يمكن يتلاحقوا بجريمة قتل ديبلوماسيين ..وبيصيروا مطلوبين بالعالم .. وماحدا بيقدر يدافع عنهم لاإسرائيل ولاأمريكا .. لأنهم اذا دافعوا عنهم .. بيكونوا عم يعترفوا بشرعية قتل الديبلوماسيين وبيروح العالم على فوضى أكبر من الفوضى اللي عاملها النظام الأمريكي وإسرائيل ..وبكره اذا احتجوا على مقتل أي ديبلوماسي ..بيرد عليهم العالم .. بقضية الديبلوماسيين الإيرانيين .. وهيك بتخرس الأمم المتحدة وبيخرس كل أنصار أمريكا وإسرائيل .!! . يعني برأيك ممكن يتلاحق أمين الجميل وجعجع ..؟ - ليش لأ .. إلا إذا طلعت علينا أمريكا بشي فتوى متل هدول فقهاء النفط والدولار اللي مستعدين يبرروا كل شي اسمو خيانة ومعاداة لشعوبنا , لأ وقعدوا محل رب العالمين وأشكالهم عينك ماتشوف ..الله لايوريك هيك مناظر . شي أعور .. وشي طالعة سنانو برا تمو .. وشي مشتور عاليمين .. وشي وشوا أصفر من غير علة .. حتى انهم عطوا فكرة للعالم انو شعوبنا كلها على هالنمرة . بصراحة حق العالم يقول انو الشعب اللي هيك أشكال عم تفتي له وبيقبل فتاويهم مابيستحق الاحترام . ولك ياعمي اللي محيرني ..ليش جن جنونهم لما انتصر حزب الله على إسرائيل ..وجنوا أكثر لما مارضخت حماس لأسرائيل وللمعتدلين العرب وفرضت شروطها على اسرائيل .. ومع كل هيك بيقعدوا يحكوا بالكفر والإيمان على قياسهم وقياس إسرائيل وأمريكا مع انو ربهم الحقيقي هو الدولار المعطر بالنفط . قصدك تقول انو اللي عنا هون متلهم .؟ - الفاسد شريكهم مين ماكان يكون .. والفاسد مستحيل يكون وطني ولو جاب شهادة موقعة من الملائكة . خاصة بهالظروف اللي عم نمر فيها .. وكأنه مش كافينا الهجمة بيقوموا بيكملوها بفسادهم الي بيضعف أقوى شعب وأكبر دولة ... روح راجع التاريخ بتشوف انو اللي خرب أكبر الدول ودمر المجتمعات ( البطر وفساد البطرانين ) . يعني ..على قولك ..مافي أمل ..؟ - مافي أمل ..إلا إذا اشتغل التنظيف وجمع هالفاسدين ورميهم بأول مكب نفايات حتى البلد ترتاح وتصير ريحتها أحلى . واللا ألله يستر . ؟. ولك ياعمي فسادهم عم يخرب المجتمع .. مش شايف كيف الناس ملهوفة عالثروة بأي طريقة ..؟ مش شايف الغش والنفاق والكذب . والفلتان والفوضى والنهب والغش اللي ضاربه أطنابها عيني عينك واللي ماإلها علاقة بالحرية بنوب ياخيو .. . مش شايف .. لاالتجارة الها شكل تجارة ..ولا صاحب مهنة مقتنع بشغله .. ولا المسؤول مسؤول عن شي .. ولا القاضي قاضي وراضي .. ولا التفتيش تفتيش .. ولا الموظف موظف ..وكله فاتح تمو عالأخير بدو يشفط الدنيا وماعليها .. ولما بترفع صوتك .. بينطوا متل القرود وبيزعقوا ياغيرة الشرف والوطن ولك والدين كمان .. ؟ .. حتى موظف البلدية صار عامللي ربكم الأعلى وفاتحلي فرع مخابرات لحسابه ..كلو بدو سلطة منشان يشفط .. وكلو بيسرقك وبيزاود عليك .!! وياويل اللي بيوقع .. والمواطن ياولداه ..بيوقع بسهولة ..لأنو مافيه بين إيديه قانون يعفس فيه على كيفه ..متل هالفاسديبن اللي بيمسكوا القانون وبيفسروه بطريقة عجيبة غريبة وإذا مالاقوا تفسير بيقوموا بيفصلوا تعليمات على كيفهم وحلها إذا فيك تحلها .!!.. وإذا التقى شي موظف أو مدير بيلتزم بالمنطق بيقوموا بيلاقولوا تهمة وبيشلحوه بشي أرشيف أو مكان مهمل حتى يموت من القهر . لأنو إذا تركوه يشتغل صح بيفضحهم وبتشوف الناس الفرق بينه وبينهم .. وهيدا الشي بيضر بالمصلحة العامة حسب تفسيرهم . يحرق حريش هالمصلحة العامة شو عم بيمر تحتها بلاوي زرقا ..؟ !!. - لكن شو عم نحكي من الصبح .. المصلحة العامة عنا ..صارت بإيدين الفاسدين متل الأمن والسلام العالمي بإيد أمريكا .. كل شي مابيعجبها بتعتبروا مخرب للسلام والأمن العالمي .. حتى إذا عطس واحد بالتيبت بيقولوا انو خطر عالأمن والسلام العالمي ولك وعلى أمن امريكا كمان ..!!! ومنشان هيك صار العالم كله والمريخ كمان ..مجال حيوي لأمريكا ..متل هتلر بفرد شكل . لأ ومع كل هيك لساهم عم يحكوا عالنازية والفاشية .. بربك مش هتلر صار طفل بريء قدامهم .؟. قالوا عن هتلر مجنون ..طلع بوش ماعندو عقل بنوب ياخيو .. متل تور مصاب بجنون البقر وفلتان عم بيعفس يمين وشمال . وماحدا عرف يمسك بشرشف أحمر ويلاعبه حتى يقطع نفسه .. ولما عملتها المقاومة عنا ولاعبت التور الأمريكي عالأصول .. طلعت الصراصير تنق وتقول هيدا ارهاب ..؟ . ولك اللي بيجنن وبيطير ضبانات العقل .. هالشعوب اللي ماعاد يهزها شي .. نايمة وعم تشخر وماحدا هون .. ولك الله يعين هالشعوب ..شو طالع بإيدها ..؟ - بربك هيدا كلام .. إذا الشعوب مابيطلع بإيدها شي ..مين اللي بيطلع بإيدو .. ؟!! ولك هيدا عذر أقبح من ذنب .. ياعمي ..إذا الشعوب تحركت بيتحرك الكون معها .. لولا حركة الشعوب ماتغير شي بالتاريخ .. ومن قريبو .. هاي الثورة الفرنسية ..مش الشعب اللي قلع الملكية وتحكم رجال الدين اللي كانوا خدم للملك والكونتيات ..وهيك تغير وجه العالم ومنها بلشت النهضة الأوربية . بس كان عندهم نخبة شريفة تحركهم .. مش متلنا ..؟ - ليش مين قال لك إنو ماعندنا نخب .. بس مابعرف شو بدي قول لك ؟ . العالم العربي مليان نخب .. بس تايهين ياولداه ..مابيعرفوا يحكوا مع الشارع ..بيقوموا بيحكوا مع بعضهم البعض وشوشة .. أو بيطلعولك بدراسات ماحدا بيفهم منها شي .. بيجمعوا شوية مصطلحات على شوية أفكار على سندويشة هامبرغر على علبة بيبسي على علبة مارلبورو وبيختموها بكام شفة نسكافيه على كافيه ميت .. بيقوم الشارع بيفوت ببعضه وماحدا بيفهم على حدا . ؟. ولك والله شي بيحير .!!. شو اللي ضاربهم ..ومابيتلفتوا حواليهم ويطلعوا بأفكار مناسبة للناس .. على فنجان قهوة أرابيكا . شوبها القهوة المرة ..مش أطيب ..بربك قوللي ؟!!. مش أحسن من كل هالخلطة اللي بتسبب لهم بارتفاع حرارة وهذيان وهلوسة واسهالات وخرفشة وهيك بيوقفوا عالمفارق تايهين مابيعرفوا اليمين من اليسار ولاراسهم من رجليهم . مش شايف حتى بعض اللي مسميين أنفسهم يساريين صاروا عم يترغلوا بالعبري متل المتشددين اللي عم يكفروا كل البشر .. الله وكيلك نفس الترغلة ..بس النغمة عم تختلف .. واحد بيغني مع كمشة بنات نصف ستربتيز وواحد عم بيغني حاف حتى بدون موسيقى ..!!. طيب شو الحل برأيك ..؟! - حل عنا ياااه .. شو عم بحكي لحالي ..!!!.
|
|||||||||
          |
|
أكثر المواضيع قراءة هذا الأسبوع |
 |
| RSS Feeds |
|---|
|
روابط XML
|
| مواقع سورية |
|---|
| مواقع مهمة |
|---|