ارسل مساهمة
 
اتصل بنا

في سورية
البداية arrow تناقضات آدم arrow موقف باص arrow تعال َ نهلوس سوا ..( وين الشرف العربي ..وين ) ..؟!!.
تعال َ نهلوس سوا ..( وين الشرف العربي ..وين ) ..؟!!. Print E-mail
هلوسات - موقف باص
07 تموز 2008 الساعة 13:30
بقلم: خليل صارم - سوريا 
   
  ياأخونا ..لاتشكيلي ببكيلك .. اتفقنا .. منشكي سوا ..منبكي سوا .. وهيك  منتعادل .
.. والله هيك حكي معقول ..
وين بدك نهلوس .. وكيف بدنا نبلش . ؟؟.
..قبل كل شي ..شورأيك بضرب مته  ..بياخد وقت طويل .. ومنهلوس بالبيت لامين شاف ولامين درى ..ولامين سمع وطرقنا تقرير على كيفو وحسب تحليله للكلام ..؟.
يخرب بيتك ..اللي بيسمعك بيفكر بدنا نعمل ضرب بانجو واللا نطرق شمة . واللا بدنا نخطط  لشي مؤامرة .؟!!
.. ولك لاااه ياعمي ..أنا قصدي قعدة تخبيص و صفا نخرفش فيها على كيفنا بدون ماحدا يعلق علينا ويتهمنا. أو حتى يزعل وندخل معو بجدل مابيخلص .
   ماشي ياسيدي بس ليش بدنا نخاف .؟.الحكي عنا صار ببلاش وماعليه رسوم جمارك ولارسوم بلدية والمخبرين صاروا فاشوش ماعاد حدا بيسأل عنهم  , يعني لت واعجن على كيفك ماحدا سائل عنك .
.. فيها وجهة نظر ومعقولية ..بس أنا مابحب المته  وبفضل مصمص شفافي بدل مصمصة انتين السيارة اللي قلبوه مصاصة .!!
طيب بحضرلك  ضرب أركيلة على كيفك  مع دلة القهوة .. وهيك بتطول الجلسة .. وبتتساوى القرقعة .. قرقعة المته وقرقعة الأركيلة ومنشوف مين بدو يقرقع أكثر .
... والله ِ..معقول .. خوش كلام .. أكشن يابي .

                                       ( بعد قليل )
اي سيدي انشاءالله روقت وعجبتك الأركيلة .. ؟
..تمام .
بتعرف كل ماطال نبريج الأركيلة بيصير النفس أطيب ..؟
..لاوالله مابعرف ..ومنكم نستفيد . !! باين اكتشاف جديد واللا الو علاقة بالتطوير والتحديث .
- الله لايعطيك عافية ..لوين رايح .. خلينا هون يستر على حريمك .
.. ولك شو حكينا .. مش كل شي جديد بيدخل في التطوير .. شوف الشباب كلو جدد المكاتب والفرش الفخم  والسيارات والفيللات والشاليهات والمدامات كمان .. قال هاي من بريستيج الادارة ..!! وهيك منصير بلد متحضر يابعدي .
ياحبيبي بكره بيعملوا كباب بلحمة فشافيش وبتلاقي مين يقول الطعمة تمام .. شو بدك تقول ساعتها ..؟.
... ياسيدي بقول ساعتها تعالوا شوفوا التحشيش . والتسطيل .. والتهميش . لأنو ساعتها الشباب بيكونوا قلبوا  التطوير والتحديث لتهميش وتفييش  وانسطال وتحشيش .
برافو هيدا الحكي اللي بيجيب نتيجة  .. يعني بالمشرمحي  .. هوَه ( مع حفظ الألقاب ) بوادي وبقية الشباب بوادي تاني .. وسمعني اذا فيك تسمعني .
.. أخي .. تعا لنحكي  بخصوصياتنا .
تفضل .. .
.. الحقيقة نحنا اصحاب من زمان بس اللي محيرني اني ماعم بعرف صنفك .. هلق انت َ معارض واللا موالي .
أنا معارض وموالي بوقت واحد .
.. اعربها .. مافهمت .
 عد على أصابعك .. أنا معارض للفساد .. ومعارض للأنظمة العربية اللي عاملة ستربتيز على طول الخط .. ومعارض للحكومة اللبنانية تبع اللي بالي بالك .. ومعارض لحكومتنا اللي بتزعبر علينا  وبتوعدنا وبيطلع الوعد بالعكس . ومعارض لسياستنا الداخلية  اللي عاملة الناس فيران تجارب .. بيطلعولنا بنظرية .. بيجربوها .. بتطلع غلط .. وبدون مايعتذروا بينتقلوا لغيرها .. والفرامة عم تفرم بمصالح هالناس .
وأنا موالي للمقاومة وموالي لسياستنا الخارجية وموالي للقرارات والمراسيم اللي مابيطبقوها واذا بدهم يطبقوها بيغيروا معناها وبيفسروها على كيفهم متل تفسيرات فقهاء السلطة أيام زمان . ومنشان هيك أنا معارض لعدم محاسبتهم .. وأنا موالي لكل مين بيكره اسرائيل والصهيونية والنظام الأمريكي . وانشالله بيكون اسرائيلي .
وأنا عم كررها للمرة الألف قدامك ولسه بتسألني اذا كنت معارض أو موالي .
.. أنا بفهم انو المعارضة بتكون معارضة على طول الخط والموالي بيكون موالي على طول الخط ..؟
ياحبيبي ..هيك بتفهم المعارضة والموالاة .. ؟!ّ بهالحالة بتكون المعارضة كيد ونكاية وحقد وحرب .. وبتكون الموالاة حمير بتنهق عالفاضي والمليان .. أنا بفهم المعارضة .. انك تشوف غلط من الحكومة .. بتدل عالغلط بصوت عالي  واذا مابدهم يتراجعوا أو يبينوا ليش صار الغلط ويطنشوا معناها ان الحكومة سيئة النية ومش كويسة  وعليها أن تحل عن ظهرنا .. وعليك أن تنشر عرضها وتفضحها .. والمعارضة كمان اذا ضربت الحكومة كوع مفاجيء ودخلت بشي زاروب سياسي ..وقتها بترفع صوتك وتبين وين الغلط وهم مجبرين على الرد والتبرير والاقناع فاذا لم يحصل يصبح معنى ذلك انها غير مهتمة برأي الناس وعندها يصبح من حقك أن ترفع صوتك وتنبه الناس الى القانون والدستور وتبين وين الغلط ووين المخالفة .
 دخلك هالأيام في وسيط تركي بيننا وبين اسرائيل .. اسرائيل بتقول انها مستعدة لاعادة الجولان .. طيب ..شو الضمانة .. هذا السؤال من حق الشارع .. بدنا ضمانات من العالم ..وضمانات خطية حتى لايتملصوا منها .( واللي فهمتوا انو القيادة طالبت بالضمانات ) شي كويس .. وأن يبدأوا بالانسحاب ويثبتوا حسن النية .. ومن حقنا إنا نطالب بتعويضات لأبناء الجولان عن خراب بيوتهم وعيشتهم لاجئين طول المدة . بدنا ثمن المياه اللي سرقوها . حسناً ..بدهم يكون سلام بيناتنا ..جيد ..هيك منوفر ضحايا ومنلتفت لتصليح البلد بشكل ممتاز .. بس الفلسطينيين ..وحق العودة .. بدهم يعترفوا فيها  .؟. مابيصير يبقى الفلسطينيين لاجئين في سوريا ولبنان والأردن وبقية أرض الله .. لازم حق العودة يكون مضمون ويعيشوا بأمان واطمئنان متل بقية خلق الله  .
عليهم هم أن يثبتوا حسن النية ..ويتخلوا عن مشاريع حمقاء نتيجتها ستنعكس عليهم هم مهما طال الزمن .. منذ بدء المشروع الغربي الصهيوني ..وهناك دمار وخراب وضحايا ..كيف سيتم التعويض عن ذلك ..؟ من سيتحمل وزر هذه الجريمة المتواصلة .من سيدفع ثمن تعطيل نمو وتقدم شعوب هذه المنطقة . أنا معك  أنو  بؤر النظام السياسي العربي شريكة في المسؤولية ولازم يدفعوا ثمن موبقاتهم كلها ..من بقي منهم عليه أن يدفع الثمن مثل العدو تماماً . .  الكل بيعرف  أنو فيه أنظمة بيقولوا عنها عربية تكفلت بإمداد اسرائيل ودعمها ومحاربة كل قوى المقاومة الوطنية كرمال عيون  اسرائيل ..هدول بدنا  نفتح الحساب معهم تماماً مثل اسرائيل . لازم  يدفعوا الثمن ويتعاقبوا . وكمان اذا طالبوا  بتخفيض قوات وأسلحة بيكون متبادل ..عالقد  .. واذا بدهم مناطق خالية من السلاح بيكون من الطرفين ..مش من عنا بس . . وبدنا رقابة على النشاطات النووية تبعهم . وكمان ماحدا الة هلاقة بتحالفاتنا .. والواضح انو القيادة قالت هالكلام لأنو من أعمال السيادة .
..هو..هووووه .. دغري طلعت برا الحدود ..؟
مين قال لك انو في حدود وفواصل بين كل هالأمور  .. التداعيات بتوصل لإدق  التفاصيل ..من برا الحدود من خارج المنطقة ..من أوربا وسياساتها ..من أمريكا وسياساتها .
-       قرقع بالأركيلة أحسن لك  لأنو هيدا الحكي مش معقول .. ؟
.. والله هيدا اللي عندي ..عجبك أهلا ً وسهلا ً ..ماعجبك ..استأنف . واللا بقولك .. قرقع مته وتفتف بزر . وهيك بتنسى .
-       شو بدنا بهالحكي الكبير .. شو رأيك ليش المحافظ والتموين مابيتحركوا  وبيراقبوا الأفران اللي عم يسرقونا عيني عينك .؟
.. طيب قبل مايتحرك المحافظ والتموين ..سيادتك شو عم تعمل .. ليش مابتعترض على وزن الخبز وعلى النوعية . ؟
-       والله اعترضت .. والفران فاللي روح ..؟؟؟...يها . . وقام بعت الشغيلة تبعو بدهم يعملولي بدن... طيب هلق  انت .. سيادتك .. عم تحتج ..؟
.. طبعاً احتجيت ومن يومها عم باخد بالوزن .. بس والله ولاد الكلب بدهم يسرقوا ولو رغيف واحد . يعني محسوبة عندهم . . ولك مش شايف ماظل فران الا وصار عندو سيارات وفيللات وتحول لتاجر عقارات . صار في عنا فصيلة غنية جديدة وعليك انو تتصور ثقافتها ومفهومها للاقتصاد .. مفهوم حرامية ,,متل غيرهم .. وهيك بينضاف مخربين جدد لأقتصادنا ..والحكاية مش ناقصة !! .. فعلاً عجيبة يارجل .. هلق السوريين أغنياء لهالدرجة .. الكل عم ينهش فيهم وماحدا بيشكي ..؟.. شو القصة . ؟!!.
-       ولييييي هلق دخلنا بالجد .!!. مابعرف .. مادخلني .؟. أنا مستعد احكي بالسياسة وسب على كل زعما العالم .. أما على الفرانه والبقالين وتجار السيارات والعقارات والحرامية ..هيدي بدها حسابات غير شكل .
.. شو قصتك امبارح كنت عامللي عنتر ومبلش بالفساد والفاسدين ..شو القصة . ؟!!
-       الحقيقة .. أحدهم ..وشوشني .. ومن بعدها سكتت شهرزاد عن الكلام المباح .. بس ماطلع الصباح .؟!!  دخلك ايمتى بدو يطلع .
..  والله مابعرف ..ليش قديش الساعة ..؟ .
-       مامعي ساعة .؟
.. انشاءالله بيصير معك ساعة ومعي ساعة  ومع الكل ساعة .. بلكي منصير نفهم على بعض . ؟!
-       تعا لنحكي بصراحة .. المشكلة فينا ياجماعة .. المشكلة فينا .. المشكلة جوا كل واحد فينا قبل ماتكون بالأنظمة والاستعمار وكوكتيل الأعداء وكل مين هب ودب .
-       المشكلة في مفاهيمنا اللي كلها غلط ..اللي عملنا منها خطوط دفاع وتمترسنا وراها مامنتحرك ..والله محيي الثابت .!! .. لأ .. قال ومنسميها عادات عربية أصيلة , والحقيقة ماشفنا شي منها .. قال بيقولوا أن العرب بيتميزوا ( بالشهامة . والنخوة ..وإغاثة الملهوف ..والكرم  ونجدة المظلوم  . والشجاعة ..احم..احم .  أوعى تصدق( الكذب ملح الرجال وعيب عاللي بيصدق )  وهيك لائحة طويلة من المواصفات .. بس عالأرض مافي شي من هيدا .. صارلنا أكثر من قرن عم ننفخ فيها ..أتاري عم ننفخ بقربة مقطوعة .. أو عم ننفخ دولاب منبشر متل الغربال .. قال بيقولوا انها مواصفات العربي .. هيدي القصة بتحتمل تفسيرين .
-       - هات لنشوف . أتحفنا بتفسيراتك .؟
...  التفسيرين ياغالي : إما إنها كذبة كبيرة  كتير ومافي شي منها وانها مجرد أحلام منشان يتحول النذل لبني آدم  وهيدا مستحيل .. أو ..أن العرب انقرضوا من زماااااااان ولم تقم لهم قائمة أو قاعدة وماعاد في حيط لحدا يستند عليه . وماعندي حل ثالث . !!
بتصدق واللا مابتصدق .؟. أنا بيوجعني قلبي على جوليا بطرس .. المسكينه إلها زمان بتغني وبتصرخ .. وين ..وين .. وين الشرف العربي وين ..؟ . ولك ياعمي ماحدا عم يرد عليها .
-       شو رأيك ..ليش ماحدا عم يرد عليها .؟
...  لأنو بيستحوا يقولولها وين الشرف العربي .. حاطينوا بمحل ماإلنا عين نذكر اسموا هيك  علناً .. بعدين بيقولوا عم تخدش حياء الناس . لأنو بسبب هالنقطة بالذات بيقوموا بيصير عندهم نخوة وبيقتلوا ..وبيقولوا انها جرائم شرف .. وماحدا بيحاسبهم . والحقيقة انو التخبيص تخبيصهم .
-       أيوه .. هلق فهمت عليك .
...  أي الحمدلله . . دخلك وينو هالشرف  وغزة محاصرة وأطفالها عم بيموتوا من الجوع والمرض .. واللي مابيموت هيك ..بيتسلوا فيه الصهاينة وبيصطادوه . وين الشرف تبعهم لما وقفوا مع اسرائيل ضد المقاومة بلبنان  . وين الشرف تبعهم لما سهلوا احتلال العراق .. من وين دخل  الجيش الأمريكي والانكليزي ولك ومعاهم  هالمقاطيع تبع أوربا الشرقية السابقة .. أكيد ماوصلوا  من المريخ  مباشرة . .  وهيك صار كرم الضيافة .. وبعد مااحتلوا العراق .. بدل مايتوحد العراقيين ضد المحتل . وضد عصابات القتل اللي مصادرين رب العالمين لحسابهم . نزلوا ببعضهم  طق ودبح .. بربك شفت أندل من هيك . . وبدل مايتفق الفلسطينيين ويتوحدوا .. اختلفوا .. ونزلوا ببعضهم ضرب .. وهيك الصهيوني والأمريكي عم يتفرج ويضحك . . طيب مش العراقيين وأهل غزة والضفة ملهوفين واللا لأ .؟! . أكيد اختلافهم مش بطر ورفاهية ..!!  .
أما الكرم العربي .. حدث ولا حرج .. ماحدا بيقدر ينكرها .. والله ياعمي قدها وقدود .. بيوقع الاقتصاد الأمريكي بالعجز وهيك بتخف مساعداته لاسرائيل .. بيقوم هدول اللي بيحكوا عربي بيقولوا لهم ولك تكرموا على خشمنا ..مش عيب عالنشاما  امريكا تنهان . ( حطلي تحت النشاما شي ألف خط .. ولاتضحك ) . ولك خدوا البترول وأموال البترول ولا يهمكم .. كلها بخدمة شوارب بولتون .. وعيون بوشت ..وكندرة كوندي .. هيك الكرم واللا بلاش ياعمي .  والشعب العربي لأنو صبور وبيتحمل كرمال عيون الضيوف والملهوفين ..  مابيحكي ولا كلمة . بيتحمل الجوع والذل والاهانة ومسح الأرض فيه  وهو ساكت ( شفت النخوة ياخوي ) . أول شي بيتصلح الوضع بأمريكا وبعدين بيفكر بحالو .. وبيقولوا لبعضهم ..شو صاير .. الدنيا ماخلصت .
-       أنا شايف انو هيدي حمرنة عربية ..؟
.. الحمرنة العربية هي أحد التجليات ياغالي .. صحيح وبمناسبة الحمرنة .. من مدة سمعت كلام بيدل على هالشي  وعن هيدا البوشت وسياسته .  واللي قالو هو واحد من السياسيين الأمريكيين المعروفين والمشهورين ..وهو ( بريجنسكي ) ..بيقول هيدا ياطويل العمر إنو سياسة بوش بتنطبق على الحمير وليس على البشر ..؟!
- العمى ..العمى ..العمى .. قديش في حمير بيحكوا عربي .. وليييي على هالصواب . . من طيبو بوش بيجي عالمنطقة وبيستقبلوه بالأحضان .. أتاري سياسته  بتنطبق عليهم ..؟ . خرجهم الله لايشيلها عن قلبهم .. ولسه بيظلوا لاحقين أمريكا .. هيدي هيه شهادة أسيادهم فيهم. . ثانكيو مستر بريجنسكي  لأنك نطقت بالحقيقة .
هلق في حدا بيصدق إنو إسرائيل محاصرة غزة ..؟!! ولك ياعمي أول ماكسر أهل غزة حواجز الحدود مع مصر .. قام جن جنون الحكام العرب .. وقالوا لبعضهم ..العمى .. مصيبة ماتنتشر هالظاهرة . بكرا الناس بيضيق خلقها منها بتبلش تزيح الحدود ومنفوت ببعض .
بتصدق إنو يومها صارت حالت رعب بين الحكام العرب واسرائيل وأمريكا . . ومنشان هيك استنفروا الكل ومعهم كل أجهزة اعلام الغرب والنفط  ومضارب بني العربان ورعيانهم وكلابهم .. وبلشوا بهجمة مرتدة .. انقلبت الحكاية لمسخرة ..تمام ..متل ماحاولوا يعملوا بحرب تموز وبعدها .. صاروا يقولوا لبعض ..من وين طلعلنا نصرالله .. كنا عايشين بأمان والناس مصدقة إنو مافي أقوى من إسرائيل .. قام خلعها بدن كان راح يجيب آخرتها .. فضحها وفضحنا .. ولك كل هالدعاء عليه وماهموا .. مش شايف الدعاة الأمريكانا نازلين يدعوا عليه .. أتاري كشفهم وفضحهم قدام الناس كلها وقاعد يضحك عليهم وعلى قلة عقولهم ..مفكرين حالهم متل زمان ..اللي كانوا يضحكوا فيه عالناس اللي كانت مصدقة انهم مؤمنين .. طلعوا لامؤمنين ولاشي .. طلعوا شياطين لابسين لباس رجال دين وبيحكوا عبري كمان وطلع المرجع الأكبر تبعهم هو نفس الحاخام الأكبر تبع اسرائيل .. اللي نادى بإبادتنا كلنا . ولما بترد بيقولولك مابيصير بعدين بيقولوا عنا عنصريين . . مش شي عجيب بربك .. اللي بيكتب عالقنابل هدية لأطفال لبنان من أطفال اسرائيل ..مش عنصري ..واللي بيقول العرب خنازير نجسة لازم ينبادوا ..مش عنصري ..واللي بيدور بأمريكا يجمع تبرعات لاسرائيل تحت شعار ( ادفع دولاراً تقتل عربياًً ) مش عنصري .. واللي بيعمل افلام مهينة لشعور الناس ومعتقداتهم ..مش عنصري .. واللي بيعامل الزنوج معاملة احتقار مش عنصري .. واللي في معتقده وبرامجه الدراسية بيعلم الكراهية للبشر ..مش عنصري .. ؟!! ولما منرد بشكل بسيط .. ومنهاجمهم ..بيقولولنا اوعى هيدي عنصرية .. ؟. بربك مش الأدب اللي بينزل على البعض منا بيجيب الضغط .
وهيك عملوا مع غزة .. وهيك عم يعملوا بالمقاومة الوطنية العراقية اللي مابتضرب غير الجيش المحتل .. قالتلهم اسرائيل وأمريكا ( سنة وشيعة ) وماعاد سكتوا ..صاروا ينبحوا فيها . وكل القصة انو الناس ضد اسرائيل وأمريكا ..وشوية عملاء معها .. وهيدي قصة معروفة ..الجبان والندل والعميل ماعندو شي يتستر فيه غير الطائفية والمذهبية .
مش شايف الناس عنا كيف كلهم مع شافيز .. طيب شافيز سني واللا شيعي ..؟ ولاتستغرب بكره بيطلعلك واحد غبي وبيقولك يمكن شافيز صار سني أو شيعي ..!! لاتستغرب ياخاي .
-       صحيح والله .. شي بيحير بهيك نوعيات .. طيب أنا بحب بوتين والزلمة عاجبني .. شوفيها ..يعني لازم يكون بوتين مسلم  ..؟
.. هه ياعيني عليك ماأحلاك .. حلوة منك .؟. طيب ليش عاجبك بوتين ..؟
-       الحقيقة انو بوتين زلمة وطني ..بيحب بلده .. من أول ما استلم روسيا .. بضربة واحدة قش المافيات .. ماشفت هيدا اليهودي تبع المافيا اللي هرب على لندن .. ومنها بلش بوتين .. شوف كيف بكام سنة رجعت روسيا وقفت على رجليها وتحسنت أحوال الشعب  وصارت ترد الصاع صاعين لأمريكا .. بصراحة الزلمة روسي قومي .. بيحب بلده .. وكل واحد بيحب بلده وبدو يعملها أحسن دولة في العالم . بيستحق الاحترام . حتى ولو ماطلع بإيدو ..عالقليلة حاول ويعطيه ألف عافية . . بالمناسبة هلق مفكر لو طلع شي رئيس أمريكي وطني بيحب بلده ..منزعل شي ..؟ أكيد ماراح نزعل ..لأنو الوطني مابيخوف حدا .. الوطني بيحترم وطنية غيرو  ياعمي . واللا أنا غلطان .
-       لاوالله مش غلطان  أبداً .. الحقيقة لو طلع رئيس أمريكي وطني ..مابتقدر الايباك تشحطو من أنفه  وتخليه يضحى بسمعة أمريكا منشان اسرائيل . بدنا نحترمه  .. بس ياعمي الله وكيلك بيقتلوه ..بيغتالوه ..متل ماعملوا بكندي .. حتى عيلة كندي ياحراااام ..أبادوها ..لحقوهم واحد .. شي بيقولوا حادث ..وشي بيقولوا اغتيال والقاتل مجهول ... هلق في حدا غير الأهبل بيصدق انو دولة مثل أمريكا مابتعرف مين قتل كندي وعيلة كندي .
  متل فلم بن لادن اللي عملوه مسلسل هوليوودي  ماعاد يخلص ..صارت حلقاتو متل المسلسلات المكسيكية .. مابتخلص .. الا وقت اللي بدو المخرج .. وهون الناس متل الهبل .. مصدقة انو بن لادن ماحدا بيقدر عليه ومابيعرفوا وين متخبي ... مع انو عيلة بن لادن شريكة مع عيلة بوش بالسمسرة وتجارة النفط وعمولات النفط .
-       واضحة سيدي .. ورقة رابحة ..عم يسبب قلق لباكستان وافغانستان وارابستان .. وتجارة المخدرات شغالة والمافيا عم تربح من كل هالعي  ياحبيبي .. هيدا تحالف مافيا السلاح ومافيا المخدرات ومافيا النفط .. والنتيجة أزمات الحروب والجوع والغلاء في العالم .. !!.
 ...   يعني هيدا هو السبب برأيك .. ؟.
-       ليش مين حاكم العالم ومتحكم بالأمم المتحدة ..مش المافيا .؟.  ياحبيبي المافيا الها فروع بكل شي . وبكل الدول .. صارت بتحط حكومات وبتشيل حكومات وبتجتاح دول . ياعمي المافيا متحكمة بتجارة السلاح والمخدرات والدخان والسكر والقهوة والرز وكافة الأغذية والالبسة والعقارات والسيارات  والاعلام والسياسة . ولك حتى الفن بيدخل بتخصصات المافيا . وهيك عم يتحكموا بالبشرية . وبياخدوها وبيجيبوها على كيفهم  . أوعى تكون مفكر انو أزمة الغلاء وارتفاع أسعار النفط وبقية السلع  متل ماعم يتفلسف هالعلاكين اللي بيطلعوا عالتلفزيونات وبيقعدوا ينظروا ويجيبولك مصطلحات مابيعرفوا عنها شي .. قال مسكفين يابعدي .!!. لاحبيبي لاتصدق .. الأمور أبسط من هيك بكثير .. واضحة ومابدها شطارة وعلاك مصدي .. وكل شي عم تسمعوا بس منشان يلهونا عن الحقيقة ويدخلونا بنقاشات لابتجيب ولابتودي ... شوف هلق .. من سنة أمريكا طبعت دولارات بدون تغطية أضعاف مضاعفة للتغطية الحقيقية ..هيدا يعني تضخم ياغالي .. شوف امبارح ارتفع سعر الدهب بشكل جنوني .. وهيك بيجمعوا الدولارات اللي مش مغطية ..
.. أف ..ليش .
- تضرب بهالشكل ..منشان يغطوها حتى ماتبرد .؟!! .
...  معقول لها الدرجة ..؟
- ولك وأكتر ..هلق مفكر انو حق البترول اللي عم بيجن  بيرجع منو شي لمضارب عربستان ..لا حبيبي لاتحلم .. قال بياخدوا منهم النفط وبقولولهم اتركوا ثمنه في بنوكنا .. بربك في واحد بيبيع شي لواحد وبيخلي حق هالشي مع اللي اشترى .. بربك فيه هبلنه أكتر من هيك .. بكره بيقولولهم أخدنا حق البترول أجرة الحماية ..
   روح اقرا بروتوكولات حكماء صهيون ..بتعرف .. اقراها وقارنها باللي عم بيصير بتتأكد ..رغم انهم عم ينكروها .. بس الحقيقة واضحة متل عين الشمس .. صدقني اني قريتها من أول الستينات .. ولما برجعلها كل فترة وبقارن بلاقيها عم تتطبق مية بالميه ..ومع كل هيدا كان يطلع كتاب من هالعلاكين ويقول انو البروتوكولات مش صحيحة وانكم عم بتبالغوا بقوة الصهيونية ..  والحقيقة أنا صرت عم شك بهالكتاب والباحثين والمحللين .. مايكونوا عم يتستروا عالصهيونية . .؟. واللا أكيد عم يتستروا .
..  طيب ليش الناس ماعم تفضحها .؟
-       ياعمي الناس عم تفضح ..بس الاعلام الأقوى بإيدهم وبإيد العملا تبعهم .. والمصيبة انو مافي نظام عربي نشرها بأجهزة الاعلام تبعوا .. بس عبد الناصر أمر باذاعتها يومياً بعد هزيمة حزيران .. قام جن جنون أمريكا والصهيونية .. والأنظمة العربية .. وماعاد عندهم شغلة وعملة الا عبد الناصر ..وهيدي أحد تفاسير اغتيال عبد الناصر  . . وهيدا بيفسر ليش صار التآمر عليه من قلب النظام . , وهيك بتفهم شو عمل السادات بعدين .. السادات اللي كان ماسك افتتاحية مجلة المصور وبكل عدد بيبدأ بمقال عنوانه ..( هذا عمك جمال ياولدي ) .. شفت النفاق العربي الأصيل ..؟. شفت الشرف العربي وين ..؟ . عفواً جوليا بطرس ..منشان الله ماتزعلي .

هلوسات - سورية - مجتمع - ثقافة - منتديات

تعليقات الزوار - لن ينشر أي تعليق فيه شخصنة أو عنصرية أو طائفية أو تحريض على العنف أو خارج عن أدب الحوار
الاسم