تلك 1: لك صحي ايمتى عرس اختك سمية ؟ مو على أساس كان العريس مستعجل ؟
هي : والله ما مشي الحال …فسخنا الخطبة …صارت هيك ظروف آم…
تلك 1: ييييييه !!! ايمتى ؟ والله ما درينا !!! ليش شو صار؟ ليكون لأنه على سفر؟
هي : لأا مو قصة سفر …هو …

تلك 2 : يا اختي والله الجوازة على سفر مو سهلة …خصوصي على أميركا …يا حرام هالشباب العرب عم يروحوا يجلوا صحون وعم يتمئطعوا فيهم هلأميركان!
تلك 3: يعني لو على دبي كانت معقولة …ليكها وعد آعدة هينك وصارت وتصورت.
تلك 4: أي حبيبتي اللي صار لوعد ما صار لحدا …قال روحي يا حلوة بجمالك وتعي يا بشعة بحظّاتك …أي ولي على قامتها اجاها حظ وحظ !!!
هي : ليش ما عرفتوا انو وعد رجعت عالشام هي وابنها ورافعة دعوى طلاق ؟
تلك 3: له له له !!! يا حراااااااام …ايه هو كان مبين من الأول مو منيح …كحتة وأهله كتير شراشيح …مسكينة هالوعد والله آدمية وما بتستاهل !!!
تلك 2: أي لئوي تشدي ايدك … كمان هي مو قليلة أي قصصها كانت طابلة الدنيا …بزمانها قالت لي بنت خالة جارتها انو مو مخلية شب من شرها والسيارات كانت توصلها عالبيت بنصاص الليالي …ما بدنا نحط حدا بذمتنا هلأ …ما بحب احكي على حدا أنا …ما قلتيلنا ليش فسختو الخطبة؟
هي: صار في شوية مشاكل وهو …
تلك 1: لك يخرب بيتهم هالرجال شو نفسهم دنية …لك بتكون عندهم مرة ما في منها وبتلاقيهم طالعة عينهم لبرة …فظاعة ما عاد حدا عجبته مرته وكلو بدو ياها تصير متل هيفا وهبي!!!
تلك 2: لك بدي افهم هي هيفا الضرابة على شو حابينا الرجال ؟!! لك ما فيها شي طبيعي كله تجميل بتجميل …أي والله شفتلها صورة من زمان …أي كانت سودة زرقا وما بتنتص !!!
تلك 4: لك سمعتلك انو ما عم يخلوها تعمل حفلات بالشام من أد مالها خليعة وحركاتها نورية !!!
هي: لأ ما بعتئد انو هيك القصة …لا هي ولا غيرها خرج يجوا بهالمرحلة …بتعرفي الأوضاع مو سهلة بلينان بظروف الحرب وصارت ....
تلك 1: لا تذكريني منشان الله …جوزي طول مالو آعد حاططلي عالأخبار وحاجز التلفزيون …يا حرام هالولاد يلي عم يموتوا … لأ وما عد فينا نطلع على بيروت بالمرة ... لك حتى السوق الحرة ما عد نقدر نوصل عليها …صار لي أسبوع عم دور على اريال و ما عم لاقي !!!
تلك 3: أي بتلاقي بالسوبر ماركت اللي بأول الشعلان …هادا كل شي عندو أجنبي بس أغلى من السوق الحرة …
تلك 2: ايه والله أغلى بكتير …الله يستر شو لسه بدو يصير بهالبلد !!!
تلك 4: لك ما قلتيلنا ليش فسختوا الخطبة ؟
هي : هو اللي فسخها …
تلك 1،2،3،4 ….."صمت مطبق" …….

علا سليمان